لاہور:
پاکستان سپر لیگ (پی ایس ایل) کے گیارھویں ایڈیشن کو نئے فارمیٹ کے تحت کرانے کی تیاری کی جا رہی ہے، جس میں آٹھ ٹیموں پر مشتمل توسیع شدہ ٹورنامنٹ کو دو مراحل میں مکمل کیا جائے گا۔ رپورٹس کے مطابق پی ایس ایل 11 کا انعقاد 26 مارچ سے 3 مئی 2026 تک کیا جائے گا، جس دوران 39 دنوں میں مجموعی طور پر 44 میچز کھیلے جائیں گے۔
تفصیلات کے مطابق نئے ڈھانچے کا مقصد ٹیموں کی تعداد میں اضافے کے باوجود ٹورنامنٹ کے دورانیے کو غیر ضروری طور پر طویل ہونے سے بچانا ہے، جس کے لیے روایتی لیگ سسٹم سے ہٹ کر نیا طریقہ کار اپنایا جا رہا ہے۔
پہلے مرحلے میں سنگل لیگ فارمیٹ کے تحت تمام آٹھ ٹیمیں ایک دوسرے کے خلاف ایک ایک میچ کھیلیں گی، جس سے مقابلے کا معیار یکساں رکھا جا سکے گا اور تمام ٹیموں کو برابر مواقع حاصل ہوں گے۔
دوسرے مرحلے میں ٹورنامنٹ سپر فور طرز پر کھیلا جائے گا، جس میں آٹھ ٹیموں کو چار چار ٹیموں کے دو گروپس میں تقسیم کر دیا جائے گا۔ اس مرحلے میں ہر ٹیم تین میچز کھیلے گی، جس کے نتیجے میں کل 12 میچز ہوں گے اور یہی مرحلہ ناک آؤٹ مرحلے سے قبل پوائنٹس ٹیبل کی حتمی شکل دے گا۔
سپر فور مرحلے کے اختتام پر ٹاپ دو ٹیمیں پلے آف مرحلے میں پہنچیں گی۔ ماضی کی طرح اس بار بھی چار پلے آف میچز، جن میں فائنل شامل ہوگا، کے ذریعے پی ایس ایل 11 کی چیمپئن ٹیم کا فیصلہ کیا جائے گا۔
نئے فارمیٹ اور ٹیموں کی تعداد بڑھنے کے باوجود ہر ٹیم کو کم از کم 10 میچز کھیلنے کی ضمانت دی جائے گی، جو گزشتہ سیزنز کے برابر ہے۔
پی ایس ایل 11 کے میچز کراچی، لاہور، راولپنڈی اور ملتان میں کھیلے جائیں گے، جبکہ اقبال اسٹیڈیم فیصل آباد پہلی بار پی ایس ایل کے میچز کی میزبانی کے لیے تیار ہے، جو لیگ کی تاریخ میں ایک اہم پیش رفت سمجھی جا رہی ہے۔
