میں نے غلطی کی — رنبیر کپور سے علیحدگی پر کترینہ کیف کا جذباتی اعتراف
بالی ووڈ کی معروف اداکارہ کترینہ کیف نے رنبیر کپور سے تعلق ختم ہونے کے بعد جس ذہنی و جذباتی کیفیت کا سامنا کیا، اس کے بارے میں معروف صحافی پوجا سمنت کے انکشافات نے ایک بار پھر مداحوں کی توجہ حاصل کر لی ہے۔ پوجا سمنت کے مطابق یہ دور کترینہ کیف کی زندگی کے مشکل ترین مراحل میں سے ایک تھا۔
صحافی نے بتایا کہ ایک انٹرویو کے دوران کترینہ کیف شدید پریشانی میں مبتلا دکھائی دیں اور کئی مرتبہ جذبات پر قابو نہ رکھ سکیں۔ اس موقع پر کترینہ کیف بار بار یہ کہتی رہیں کہ “میں نے غلطی کی ہے اور اپنے کیریئر کو نقصان پہنچانے کی ذمہ دار خود ہوں”۔
پوجا سمنت کے مطابق کترینہ کیف نے اس رشتے میں دل کھول کر محبت کی، مگر جب یہ تعلق اپنے انجام کو پہنچا تو انہیں گہرے صدمے کا سامنا کرنا پڑا۔ کترینہ کا ماننا تھا کہ اس تعلق کے دوران انہوں نے کئی بڑی فلموں کی پیشکشیں مسترد کیں کیونکہ وہ شادی اور ذاتی زندگی کو ترجیح دینے کے بارے میں سنجیدگی سے سوچ رہی تھیں۔
انہوں نے مزید بتایا کہ کترینہ کیف یہ سمجھتی تھیں کہ رنبیر کپور سے شادی کے بعد وہ کپور خاندان کا حصہ بن جائیں گی، جہاں اس وقت تک یہ تاثر موجود تھا کہ خاندان کی بہوؤں کے لیے فلموں میں کام کرنا آسان نہیں ہوتا۔ اسی سوچ کے تحت انہوں نے اپنے کام میں کمی کر دی، جس پر بعد میں انہیں افسوس رہا۔
تعلق کے خاتمے کے بعد کترینہ کیف شدید مایوسی اور ذہنی دباؤ کا شکار رہیں، تاہم وقت کے ساتھ انہوں نے خود کو سنبھالا اور اپنی پیشہ ورانہ زندگی پر دوبارہ توجہ مرکوز کی۔ بعد ازاں کترینہ کیف نے اداکار وکی کوشل سے شادی کی، جو بالی ووڈ کی کامیاب اور مقبول شادیوں میں شمار کی جاتی ہے۔
میڈیا رپورٹس کے مطابق نومبر میں کترینہ کیف اور وکی کوشل کے ہاں بیٹے کی پیدائش ہوئی، جس کے بعد اداکارہ کی زندگی میں ایک نیا اور خوشگوار باب شروع ہوا۔ مداحوں کا کہنا ہے کہ کترینہ کیف نے ذاتی مشکلات کے باوجود خود کو مضبوط ثابت کیا اور ایک بار پھر خوشیوں کی طرف لوٹ آئیں۔
