اسلام آباد:
پاکستان کرکٹ بورڈ (پی سی بی) نے آئی سی سی انڈر 19 ورلڈ کپ 2026 اور اس سے قبل ہونے والی سہ ملکی سیریز کے لیے پاکستان انڈر 19 کرکٹ ٹیم کا اعلان کر دیا ہے، جس کی قیادت فرحان یوسف بدستور کریں گے۔
پی سی بی کے مطابق سہ ملکی سیریز 25 دسمبر سے 6 جنوری تک زمبابوے میں کھیلی جائے گی، جس میں پاکستان، افغانستان اور میزبان زمبابوے کی انڈر 19 ٹیمیں شریک ہوں گی۔ سیریز کے دوران پاکستان ٹیم چار میچز کھیلے گی جبکہ فائنل 6 جنوری کو منعقد ہوگا۔
اس کے بعد آئی سی سی انڈر 19 ورلڈ کپ 15 جنوری سے 6 فروری تک زمبابوے اور نمیبیا میں کھیلا جائے گا۔ دونوں ٹورنامنٹس 50 اوور فارمیٹ پر مشتمل ہوں گے، جنہیں عالمی سطح پر نوجوان کرکٹرز کے لیے اہم پلیٹ فارم قرار دیا جاتا ہے۔
پاکستان انڈر 19 اسکواڈ میں ایک تبدیلی بھی کی گئی ہے، جس کے تحت عمر زیب کو محمد حذیفہ کی جگہ ٹیم میں شامل کیا گیا ہے۔ سلیکشن کمیٹی کے مطابق یہ فیصلہ حالیہ کارکردگی اور ٹیم کے مجموعی توازن کو مدِنظر رکھتے ہوئے کیا گیا۔
اعلان کردہ اسکواڈ میں فرحان یوسف (کپتان)، عثمان خان (نائب کپتان)، عبدالسبحان، احمد حسین، علی حسن بلوچ، علی رضا، دانیال علی خان، حمزہ ظہور، حذیفہ احسن، عمر زیب، مومن قمر، محمد صیّام، محمد شایان، نقاب شفیق اور سمیر منہاس شامل ہیں۔
کرکٹ حلقوں کے مطابق سہ ملکی سیریز نوجوان کھلاڑیوں کے لیے ورلڈ کپ سے قبل اپنی صلاحیتیں آزمانے اور بین الاقوامی تجربہ حاصل کرنے کا بہترین موقع ثابت ہو گی، جبکہ شائقین کو پاکستان کے ابھرتے ہوئے ٹیلنٹ کو ایکشن میں دیکھنے کا موقع ملے گا۔
