تلنگانہ میں انوکھا انتخابی واقعہ، حکام شش و پنج کا شکار
تلنگانہ: (ویب ڈیسک)
دنیا بھر کے جمہوری ممالک میں عوام ووٹ کے ذریعے اپنے نمائندوں کا انتخاب کرتے ہیں، تاہم بعض اوقات انتخابات ایسے حیران کن نتائج بھی سامنے لے آتے ہیں جو سب کو چونکا دیتے ہیں۔ بھارت کی ریاست تلنگانہ میں ہونے والے پنچایت انتخابات میں بھی ایک ایسا ہی غیر معمولی اور حیرت انگیز واقعہ پیش آیا، جہاں پولنگ سے پانچ روز قبل انتقال کر جانے والا امیدوار کامیاب قرار پایا۔
بھارتی میڈیا رپورٹس کے مطابق تلنگانہ کے ایک گاؤں میں پنچایت انتخابات کے نتائج سامنے آنے پر معلوم ہوا کہ سب سے زیادہ ووٹ حاصل کرنے والا امیدوار 23 سالہ مرلی تھا، جو پولنگ سے پانچ روز قبل دل کا دورہ پڑنے کے باعث انتقال کر چکا تھا۔ مرلی کے انتقال کے باوجود اس کا نام بیلٹ پیپر سے خارج نہیں کیا جا سکا، جس کے باعث ووٹنگ مقررہ شیڈول کے مطابق جاری رہی۔
ووٹوں کی گنتی کے دوران جب نتائج سامنے آئے تو انتخابی عملے اور مقامی حکام بھی حیرت میں پڑ گئے، کیونکہ متوفی امیدوار نے اپنے دیگر زندہ امیدواروں کو واضح اکثریت سے شکست دے دی۔ اس غیر متوقع نتیجے نے نہ صرف عوام بلکہ الیکشن حکام کو بھی شش و پنج میں مبتلا کر دیا۔
رپورٹ کے مطابق ریٹرننگ آفیسر (آر وی او) نے صورتحال کی سنگینی کو دیکھتے ہوئے انتخابی نتائج عارضی طور پر روک دیے ہیں اور اس معاملے پر اعلیٰ حکام سے رہنمائی طلب کر لی گئی ہے۔ حکام اس بات کا جائزہ لے رہے ہیں کہ آیا دوبارہ انتخابات کرائے جائیں یا قانون کے مطابق کوئی متبادل فیصلہ کیا جائے۔
سیاسی تجزیہ کاروں کے مطابق یہ واقعہ نہ صرف انتخابی نظام میں موجود خامیوں کی نشاندہی کرتا ہے بلکہ ووٹرز کے جذبات اور مقامی سیاست کی پیچیدگیوں کو بھی اجاگر کرتا ہے۔ ماضی میں بھارت سمیت دنیا کے مختلف ممالک میں اس نوعیت کے چند واقعات پیش آ چکے ہیں، تاہم تلنگانہ کا یہ واقعہ حالیہ برسوں میں سب سے زیادہ توجہ حاصل کر رہا ہے۔
حتمی فیصلے کا اعلان الیکشن کمیشن کی جانب سے قانونی مشاورت کے بعد متوقع ہے، جبکہ عوام اور سیاسی حلقے اس غیر معمولی انتخابی نتیجے پر گہری نظر رکھے ہوئے ہیں۔
