کراچی (خصوصی رپورٹ) — سٹیٹ بینک آف پاکستان نے مانیٹری پالیسی کا اعلان کرتے ہوئے شرح سود میں کمی کر دی ہے۔ مرکزی بینک کی جانب سے پالیسی ریٹ میں 50 بیسز پوائنٹس کی کمی کی گئی ہے، جس کے بعد شرح سود 11 فیصد سے کم ہو کر 10.5 فیصد ہو گئی ہے۔ یہ فیصلہ پیر کے روز ہونے والے مانیٹری پالیسی کمیٹی کے اجلاس میں کیا گیا۔
سٹیٹ بینک کے مطابق اجلاس میں ملکی معاشی اعشاریوں، مہنگائی کی صورتحال، شرح نمو اور مالی استحکام کا تفصیلی جائزہ لیا گیا، جس کے بعد شرح سود میں کمی کا فیصلہ کیا گیا۔ واضح رہے کہ اس سے قبل سٹیٹ بینک گزشتہ چار مسلسل اجلاسوں میں شرح سود کو 11 فیصد پر برقرار رکھے ہوئے تھا۔
معاشی ماہرین کا کہنا ہے کہ حالیہ مہینوں میں مہنگائی کی شرح میں نمایاں کمی دیکھی گئی ہے، جس کے باعث کاروباری طبقہ اور صنعتی حلقے طویل عرصے سے شرح سود میں کمی کا مطالبہ کر رہے تھے۔ زیادہ شرح سود کی وجہ سے سرمایہ کاری اور کاروباری سرگرمیاں متاثر ہو رہی تھیں، جبکہ قرضوں کی لاگت بھی خاصی بڑھ گئی تھی۔
ماہرین کے مطابق سٹیٹ بینک کی سخت مانیٹری پالیسی پر بین الاقوامی مالیاتی فنڈ (آئی ایم ایف) کے پروگرام کا بھی اثر رہا ہے، تاہم موجودہ معاشی حالات اور مہنگائی میں کمی کے پیش نظر مرکزی بینک نے پالیسی میں نرمی کا عندیہ دیتے ہوئے شرح سود کم کرنے کا فیصلہ کیا ہے۔
تاجر برادری نے اس فیصلے کا خیرمقدم کرتے ہوئے امید ظاہر کی ہے کہ شرح سود میں کمی سے کاروباری سرگرمیوں میں بہتری آئے گی، سرمایہ کاری بڑھے گی اور معاشی پہیہ دوبارہ تیزی سے چلنا شروع ہو گا۔ تاہم ماہرین کا کہنا ہے کہ آئندہ مانیٹری پالیسی فیصلے مہنگائی، زرمبادلہ کے ذخائر اور عالمی معاشی حالات کو مدنظر رکھتے ہوئے کیے جائیں گے۔
