پشاور میں خیبر پختونخوا کی صوبائی حکومت نے ماحول دوست سفری نظام کے فروغ کے لیے مقامی سطح پر تیار کردہ الیکٹرک رکشہ متعارف کرا دیا ہے۔ یہ رکشہ صوبائی حکومت کے “کے پی سائنس ایجنڈا” کے تحت تیار کیا گیا ہے، جس کا باقاعدہ اعلان وزیرِاعلیٰ ہاؤس میں منعقدہ ہائی ٹیکنالوجی اور پروڈکٹ ڈیولپمنٹ نمائش کے دوران کیا گیا۔
حکام کے مطابق الیکٹرک رکشے فضائی آلودگی کا باعث نہیں بنتے اور ایندھن کے استعمال سے مکمل طور پر آزاد ہیں، جس سے ماحول پر منفی اثرات نمایاں طور پر کم ہو سکتے ہیں۔ انہوں نے بتایا کہ یہ رکشے نہ صرف ماحول دوست ہیں بلکہ معاشی لحاظ سے بھی فائدہ مند ہیں، کیونکہ ان میں ایندھن اور دیکھ بھال کے اخراجات انتہائی کم ہیں۔
سرکاری حکام کا کہنا ہے کہ الیکٹرک رکشوں کے استعمال سے رکشہ ڈرائیورز کی آمدن میں نمایاں اضافہ متوقع ہے۔ اندازوں کے مطابق الیکٹرک رکشہ چلانے والے ڈرائیور روایتی رکشوں کے مقابلے میں تقریباً دو گنا تک آمدن حاصل کر سکتے ہیں، جو روزگار کے مواقع اور معاشی استحکام میں اہم کردار ادا کرے گا۔
نمائش کے دوران صوبائی حکومت کے مختلف ہائی ٹیک منصوبے بھی پیش کیے گئے، جہاں منتظمین نے شرکاء کو مصنوعات کی تیاری، افادیت اور تکنیکی خصوصیات کے بارے میں تفصیلی بریفنگ دی۔ اس موقع پر مقامی سطح پر تیار کی گئی کئی جدید مصنوعات کو عوام کے سامنے رکھا گیا۔
نمائش میں جلنے کے مریضوں کے علاج کے لیے مصنوعی جلد، ہیپاٹائٹس بی اور سی، ایچ آئی وی سمیت مختلف بیماریوں کی تشخیص کے لیے پی سی آر کٹس، کان کنی کے لیے مائع آکسیجن ٹیکنالوجی، الیکٹرانک جراحی آلات اور طلبہ کے لیے الیکٹرانک اسٹڈی کارڈ سسٹم بھی شامل تھے، جنہیں شرکاء نے خاص دلچسپی سے دیکھا۔
تقریب کے مہمانِ خصوصی وزیراعلیٰ خیبر پختونخوا محمد سہیل آفریدی تھے۔ انہوں نے کہا کہ صوبائی حکومت جدید ٹیکنالوجیز، خاص طور پر جدید مٹیریلز اور بایومیڈیسن کے شعبوں میں سنجیدگی سے کام کر رہی ہے تاکہ صوبے کو سائنسی اور تکنیکی ترقی کی راہ پر گامزن کیا جا سکے۔
وزیراعلیٰ نے مزید کہا کہ یہ منصوبے نہ صرف معاشی ترقی کو تیز کریں گے بلکہ قدرتی وسائل کے ویلیو ایڈڈ استعمال کو بھی فروغ دیں گے۔ ان کا کہنا تھا کہ نمائش میں پیش کی گئی مصنوعات حکومت کے خود انحصاری کے عزم اور جدت پر مبنی ترقی کے وژن کی عملی مثال ہیں۔
